پشاور میں پولیس کسٹڈی میں ساتویں جماعت کا طالب علم جاب بحق، پولیس تشدد یا کچھ اور...؟
پشاور (ویب ڈیسک) پشاور کے تھانہ غربی میں حوالات میں مبینہ پولیس تشدد سے ساتویں جماعت کا طالب علم جاں بحق ہوگیا۔ 14 سالہ طالب علم شاہ زیب تھانے میں جاں بحق ہوگیا ہے ۔ تھانا غربی میں مبینہ پولیس تشدد سے جاں بحق ہونے والے 14 سالہ طالب علم شاہ زیب کے والد خیال اکبر نے جیو نیوز سے بات چیت کرتے ہوئے الزام عائد کیا کہ اس کے بیٹے کو حوالات میں تشدد کر کے مارا گیا ہے۔
انہوں نے کہا کہ ان کا بچہ نجی پبلک اسکول میں ساتویں جماعت کاطالب علم تھا، کل اس کا ریاضی کا پرچہ تھا، تھانے سے دوپہر2 بجے فون آیا کہ آپ کا بیٹا لاک اپ میں ہے لہٰذا تھانے آجائیں، تھانے پہنچا تو تین گھنٹے انتظار کروانے کے بعد بتایا گیا کہ آپ کے بیٹے نے خود کشی کرلی ہے۔
والد نے حکومت سے اپیل کرتے ہوئےکہا ہے کہ ہم انصاف چاہتے ہیں، دوسری جانب پولیس کا موقف ہے کہ شاہ زیب کو لیاقت بازار صدر میں دکانداروں سے تلخ کلامی اور اسلحہ تاننے پرگرفتار کیا تھا اور اس کے خلاف 15 اے اے کے تحت ایف آئی آر درج کی تاہم کچھ دیربعد شاہ زیب نےحوالات کے اندر گلے میں پھندا ڈال کرخودکشی کرلی۔
ایف آئی آر درج کیے جانے پر لواحقین نے تھانے کے سامنے احتجاج کرتے ہوئے دکانوں کے سائن بورڈز اکھاڑے اور شنہری روڈ کو ٹریفک کے لیے بند کردیا ۔
اس افسوس ناک واقعے کے خلاف ڈی جی لاء اینڈ ہیومن رائٹس نے نوٹس لیتے ہوئے کہا کہ بنیادی حقوق کے تحت تحقیقات ہوں گی اور انصاف ہوگا۔
دوسری طرف وزیراعلٰی خیبر پختونخوا محمود خان نے حوالات میں بچے کی پراسرار ہلاکت کا نوٹس لیتے ہوئے آئی جی خیبرپختونخوا کو شفاف تحقیقات کرکے رپورٹ پیش کرنے کی ہدایت کر دی۔
سی سی پی او پشاور نے کہا ہے کہ مقدمہ درج کرکے تھانے کے عملہ کو معطل اور ذمہ دار افسران کو گرفتار کر لیا گیا ہے۔