آن لائن کار سروس کریم کے شریک بانی مدثر شیخا نے لمز یونیورسٹی میں اسکالرشپس کے لئے 2 ملین ڈالر کا عطیہ دے دیا
لاہور: لمز یونیورسٹی نے سید بابر علی اسکول آف سائنس اینڈ انجینئرنگ (ایس بی اے ایس ایس ای) میں انڈرگریجویٹ اسکالرز کے لئے "سیکھا اسکالرشپ" قائم کرنے کے لئے معروف آن لائن کار سروس کریم (Careem) کے سی ای او اور شریک بانی مدثر شیخا سے 2 ملین ڈالر کا عطیہ وصول کرلیا ہے۔
لمز کے بانی پروچانسلر سید بابر علی نے کہا، "معاشرے میں مثبت اثرات پیدا کرنے کی ہماری صلاحیت پر مدثر شیخا کے اعتماد پر ہمیں فخر ہے اور ہم ان کے تعاون کے مشکور ہیں۔"
لمز کا ایس بی اے ایس ایس ای بایولوجی، کیمسٹری اور کیمیکل انجینئرنگ، کمپیوٹر سائنس، الیکٹریکل انجینئرنگ، میتھ میٹکس اور فزکس میں عالمی معیار کے انڈر گریجویٹ پروگرامز پیش کرتا ہے۔ اس اسکول کی انتہائی قابل فیکلٹی ایس بی اے ایس ایس ای اور دیگر اسکولوں میں آزادانہ فلسفے، مختلف شعبوں کے درمیان اشتراک کی حوصلہ افزائی کے ساتھ نمایاں کارکردگی میں پیش پیش رہی ہے۔
لمز کے ریکٹر شاہد حسین نے کہا، "خصوصی فیکلٹی کی رہنمائی اور بہترین سہولیات کے ساتھ طالب علموں کیلئے میرٹ اسکالرشپ کے قیام پر ہم مدثر شیخا کے انتہائی مشکور ہیں۔ اس طرح کا تعاون ہمیں درست سمت میں آگے بڑھاتا ہے۔"
یہ اسکالرشپ سائنس اور انجینئرنگ کے انڈرگریجویٹ طالب علموں کو میرٹ کی بنیاد پر فیس معافی کے ذریعے مالی تعاون فراہم کرے گی اور تعلیم میں بہترین کارکردگی کی حوصلہ افزائی کرے گی۔
اس اسکالرشپ کے بارے میں اظہار خیال کرتے ہوئے کریم (Careem) کے سی ای او اور شریک بانی مدثر شیخا نے کہا، " لوگوں کے پہلے سے جاری مخیرانہ تعاون کی بدولت میرے لئے عالمی معیار کی تعلیم کا حصول ممکن ہوا، جس نے میرے اور میری فیملی کے لئے ترقی کے دروازے کھول دیئے۔ یہ ہماری خواہش ہے کہ باصلاحیت اور محنتی طالب علم صرف اس لئے معیاری تعلیم سے محروم نہ رہیں کیونکہ وہ فیس ادا نہیں کرسکتے۔ انسانی سرمایہ سب سے قیمتی اثاثہ ہے اور اس کا ضیاع ہمارے لئے شرم کا باعث ہے۔ سیکھا اسکالرشپ کے ذریعے ہم باصلاحیت، محنتی اور مالی طور پر ضرورت مند طالب علموں کو تعاون فراہم کریں گے جو ہمارے پیارے وطن کا روشن مستقبل تعمیر کریں گے۔"
لمز کے وائس چانسلر ڈاکٹر ارشد احمد نے اس اسکالرشپ پر اظہار خیال کرتے ہوئے کہا،
"یہ ایک بڑا قابل ذکر تحفہ ہے۔ سیکھا میرٹ اسکالرشپ سائنس کے طالب علموں کو تعلیمی مہارت اور لوگوں کی زندگیاں تبدیل کرنے میں تعاون فراہم کرے گی۔"
ایس بی اے ایس ایس ای کے ڈین ڈاکٹر صبیح انور نے کہا، "کریم بالکل ابتدا سے سہولیات کی تخلیق کے لئے اسکول کے ویژن کو مثالی نگاہ سے دیکھتا ہے۔ ان سہولیات میں اتنی صلاحیت ہے کہ کس طرح سے دنیا کے کام کو تبدیل کیا جاتا ہے اور کس طرح دنیا آگے بڑھتی ہے۔ سیکھا عطیات سے نمایاں انڈر گریجویٹس مثالی تعلیم کے حصول سے اس مشن کا حصہ بنیں گے جو انہیں تبدیلی کا محرک بنانے کے لئے بااختیار بنائیں گے۔"