پشاور: ڈی ایف اے چترال کی ٹیم نے ہفتے کے روز ڈی ایف اے مردان کو شکست دے کر یوفون 4Gفٹ بال کپ خیبر پختونخواہ کا فائنل جیت لیا۔ دونوں ٹیموں کے مابین یہ میچ پشاور کے طہماس خان فٹ بال اسٹیڈیم میں کھیلا گیا جہاں شائقین کی ایک بڑی تعداد موجود تھی۔ اس ٹورنامنٹ میں صوبہ بھر سے اکہتر ٹیموں نے شرکت کی۔
فٹ بال کے ماہرین نے چترال کی ٹیم کو قومی و بین الاقوامی سطح پرمجموعی تجربے اور اس ٹورنامنٹ کے اولین ایڈیشن کے رنر اپ رہنے کی بدولت فیورٹ قرار دیا تھا۔ اس کے مقابلے میں نسبتاً نوجوان و کم تجربے کی حامل مردان کی ٹیم کو اس کی بے مثال صلاحیتوں کی بدولت مقابلے کا پانسہ پلٹنے کی اہل قراردیا گیا تھا۔دونوں ٹیمیں طہماس خان فٹ بال اسٹیڈیم میں فلڈ لائٹس کی جگمگاتی روشنیوں میں آمنے سامنے آئیں۔
میچ کے آغاز ہی میں چترال کی ٹیم کا تجربہ کام آیا اور وہ مردان کے خلاف برتری قائم کرنے میں کامیاب ہوئی۔ چترال کے کھلاڑی خلیق الزمان نے ساتھی کھلاڑی محمد رسول کے ایک خوبصورت پاس کا فائدہ اٹھاتے ہوئے بال کو گول پوسٹ کے پار پہنچا دیا۔ میچ کے چالیسویں منٹ میں چترال کے محمد رسول نے ایک مرتبہ پھر گول کردیا مگر انھیں آف سائیڈ قرار دیا گیا۔دوسرے ہاف میں دونوں ٹیموں کی جانب مخالف گول پوسٹ پر بھرپور حملے کیے گئے مگر بے نتیجہ رہے اور یوں چترال نے صفر کے مقابلے میں ایک گول سے یہ مقابلہ جیت لیا۔
میچ کے مہمان خصوصی گروپ چیف ہیومن ریسورس آفیسر پی ٹی سی ایل و یوفون، سید مظہر حسین نے فاتح اور رنر اپ ٹیموں کو میڈل، نقد انعامات اور ٹرافی پیش کی۔چترال کے ٹیم کپتان، محمد رسول نے جب ٹرافی فضا میں بلند کی تو ٹیم کے حامیوں نے نعروں اور رقص کے ذریعے اپنی مسرت کا اظہار کیا۔ شاندار کھیل کے علاوہ تماشائیوں کو موسیقی اور خوبصورت آتش بازی کے مظاہرے کے ذریعے بھی محظوظ کیا گیا۔ ڈی ایف اے چترال کی ٹیم آج بروز اتوار، 12دسمبر شام چھے بجے یوفون 4Gفٹ بال کپ کا سپر فائنل میچ ٹورنامنٹ کے بلوچستان ایڈیشن کی فاتح ٹیم مسلم کلب چمن کے خلاف کھیلے گی تاکہ ٹورنامنٹ کے حتمی فاتح کا فیصلہ کیا جاسکے۔ ٹورنامنٹ کے یہ دلچسپ مقابلے پی ٹی وی اسپورٹس، پرو پاکستانی اور یوفون 4Gکے سوشل میڈیا چینلز سے براہ راست نشر کیے جارہے ہیں۔