گھوٹکی ٹرین حادثے میں جان بحق افراد کی تعداد 62 ہوگئی، اور 100 سے زائد زخمی ہیں

گھوٹکی ٹرین حادثے میں جان بحق افراد کی تعداد 62 ہوگئی، اور 100 سے زائد زخمی ہیں 

گھوٹکی (ویب ڈیسک)  گھوٹکی ٹرین حادثے میں جان بحق افراد کی تعداد 62 ہوگئی ہے۔ ٹرین حادثے میں جاں بحق مزید 7 افراد کی لاشیں نکال لی گئیں جس سے جاں بحق ہونے والوں کی تعداد 62 ہوگئی۔ ریسکیو حکام کےمطابق حادثے کے 100 زخمیوں میں سے کئی کی حالت نازک ہے جب کہ  لودھراں کے دوسگے بھائی، والدہ اور کزن بھی جاں بحق افراد میں شامل ہیں جن کی  نمازجنازہ میں شہریوں کی بڑی تعداد نے شرکت کی۔

حادثے میں جاں بحق دو کمسنوں مومن اورہادی کی بھی شناخت ہوگئی، دونوں بچے ماں کے ساتھ کراچی سے فیصل آباد جارہے تھے۔ اس کے علاوہ ماموں اور بھانجی کی میتیں سردارو والا پہنچنے پر علاقے میں کہرام مچ گیا۔  لودھراں سے تعلق رکھنے والے شہباز ،اس کی بیوی اور دو بچوں کی لاشوں کوبھی شناخت کرلیا گیا ہے جب کہ وہاڑی کے رہائشی حضور خان کی بیوی، بیٹی اور سسر بھی جاں بحق  ہوگئے اور زخمی بیٹی زیرعلاج ہے۔حضورخان کا کہنا ہےکہ اس کا خاندان کراچی سے خانیوال جاتے ہوئے حادثے کا شکار ہوا اور اس کا کمسن بیٹا سبحان لاپتا ہے۔

ٹرین حادثے کے مقام پر ریلیف آپریشن مکمل کرلیا گیا، جائے حادثہ سے انجن اور 17 کوچز اٹھالی گئی ہیں جس کے بعد اپ اینڈ ڈاؤن ٹریک بحال کرکے ٹرین سروس بحال کرنے کا حکم دے دیا گیاہے۔

ڈی ایس نے بتایا کہ 29 گھنٹوں کے تعطل کے بعد ریلوے ٹریک پر ٹریفک بحال کردی گئی، اتوار سے رکی ٹرینیں اب منزل مقصود کی طرف چلنا شروع ہوگئی ہیں البتہ متاثرہ ٹریک پر فی الحال ٹریننوں کی اسپیڈ کم رکھی گئی ہے۔